我有一個客人，曾經滿懷夢想去買入一個喺泰國曼谷嘅溫暖後花園。你都知曼谷嘅風情有幾吸引人啦？夜市、廟宇、美食再加埋靚靚嘅物業，喺買入嘅一刻，佢覺得自己就係世界嘅贏家。不過，最近佢揾我幫手賣樓，當初嘅夢想，就變成咗疑問同掙扎。佢堅持要用一個超過市場價嘅價錢去賣出，因為佢仲留戀緊喺當時嘅回憶，當初佢透過香港嘅代理，用比市場價錢高嘅價買入，比依家個價仲要貴。我聽咗之後就盡量去安慰佢，但係殘酷嘅現實就係咁，唔會因為你比多左錢，所以人地就要比多啲錢你。其實，無論你買入嘅時候花咗幾多，賣出嘅時候都依然係要睇返市場價值，呢一個就係市場規則。佢聽完之後，搖下個頭，唉聲嘆氣。雖然係好無奈，但係同時之間，佢都學懂咗一個道理。每一個投資都係有風險，物業投資都一樣，你需要做嘅，就係喺買入之前做好市場研究同埋分析，諗清楚再行動，噉先係真正嘅投資者。喺遇過咁多個唔同嘅例子，一個又一個嘅真實故事，我見識到海外物業投資的風險同機遇。其中嘅風險，並非完全無法避免，只係我地需要有清晰嘅審視同埋分析，做好萬全嘅準備。將手中嘅錢投資去海外，睇住佢慢慢噉增值嘅過程中，你會得到更多無價嘅經驗同埋知識。呢一個係一場修行，亦都係一個提升自我，提升人生嘅過程。只有透過持續不斷嘅學習，同埋積極噉面對挑戰，我地先可以真正贏在投資海外物業嘅戰場！